«Усё лепшае з Беларусі». У Маскве на ВДНГ адкрыўся абноўлены беларускі павільён

Абноўлены Нацыянальны павільён Рэспублікі Беларусь адкрыўся сёння ў Маскве на ВДНГ. Даручэнне кардынальна змяніць работу павільёна даў Прэзідэнт Беларусі Аляксандр Лукашэнка ў пачатку лета на нарадзе, прысвечанай рэкламна-выставачнай дзейнасці. І вось гэта даручэнне выканана: павільён радыкальна змяніў свой фармат. Цяпер гэта прадстаўленая ў адзіным стылі тэрыторыя беларускіх брэндаў. Многія з іх добра знаёмыя расіянам і карыстаюцца заслужанай любоўю: прадукты харчаванні, адзенне, абутак, касметыка і многае іншае.

Як адзначаў раней Старшыня Дзяржаўнага камітэта па маёмасці Дзмітрый Матусевіч, унікальнасць абноўленаму аб'екту надасць яго фармат: усе магазіны будуць не толькі арыентаваны на рознічны гандаль, але і працаваць у якасці шоурумаў, гэта значыць пляцовак для прэзентацыі тавараў беларускіх вытворцаў. Перавагай павільёна «Рэспубліка Беларусь» на ВДНГ з'яўляецца прадастаўленне пакупнікам магчымасці за адно наведванне азнаёміцца з шырокім асартыментам беларускай прадукцыі розных таварных груп.

У ходзе цырымоніі адкрыцця значнасць падзеі падкрэсліў першы віцэ-прэм'ер Беларусі Мікалай Снапкоў, адзначыўшы, што сённяшнюю падзею характарызуюць працэсы ў сучасным свеце. «Умацоўваецца адзінства Беларусі і Расіі ў процідзеянні знешнім пагрозам і нападкам. Другое – гэта ўсведамленне згуртаванасці дзвюх краін – Расіі і Беларусі – у сумесным развіцці і будаўніцтве эфектыўнай Саюзнай дзяржавы, эфектыўнай, перш-наперш, з эканамічнага пункта гледжання», – сказаў першы віцэ-прэм'ер.

У сваю чаргу Пасол Дзмітрый Круты адзначыў, што абноўлены павільён - гэта не звычайная гандлёвая пляцоўка. «Тут прадстаўлены лепшыя ўзоры беларускай прадукцыі тых сфер, якія арыентаваны на людзей», – запэўніў ён.

У экспазіцыі прадстаўлены шырокі спектр прадукцыі беларускіх прадпрыемстваў харчовай і лёгкай прамысловасці, тут можна азнаёміцца з турыстычным патэнцыялам Беларусі, магчымасцямі санаторна-курортнага лячэння і высокатэхналагічнай медыцынскай дапамогі. Абноўлены павільён стаў не проста кропкай прыцяжэння для масквічоў і гасцей расійскай сталіцы, але візітнай карткай сучаснай Беларусі і пляцоўкай для бізнескамунікацый, наладжвання гандлёвых сувязей, правядзення выставак.

Без сумнення, асобы інтарэс у наведвальнікаў экспазіцыі выкліча фермерская экалагічна чыстая прадукцыя з малой радзімы Кіраўніка дзяржавы – з аграгарадка Александрыя.

Асобай падзеяй стала адкрыццё ў гэты дзень у абноўленым павільёне магазіна «Першы» з мерчам ад Прэзідэнта Беларусі. «Мы рады пазнаёміць расійскіх сяброў з мерчам Прэзідэнта Рэспублікі Беларусь», – сказаў на цырымоніі адкрыцця першы віцэ-прэм'ер Мікалай Снапкоў.

Гасцей беларускага павільёна сёння чакала шмат іншых прыемных сюрпрызаў – модныя дэфіле ад кампаній «Беллегпрама» і Нацыянальнай школы прыгажосці, у тым ліку дэманстрацыя адзення з мерчам Першага, выступлення артыстаў Інстытута славянскай культуры Расійскага дзяржаўнага ўніверсітэта і заслужанага артыста Беларусі Руслана Аляхно.