Прадстаўнікі «Белгеадэзіі» прынялі ўдзел у Міжнародным кангрэсе ISPRS

Прадстаўнікі дзяржаўнага прадпрыемства «Белгеадэзія» прынялі ўдзел у XXIV Міжнародным кангрэсе ISPRS (Міжнароднае таварыства фотаграмметрыі і дыстанцыйнага зандзіравання) з дакладам аб 3D-мадэліраванні і ГІС-аналізе для маніторынгу аэрадромных лясных перашкод.

У ходзе выступлення былі разгледжаны метады пабудовы і выкарыстання лічбавых фотаграмметрычных і картаграфічных мадэлей як асновы для кантролю вышыні дрэў і планавання лесапасадак на прыаэрадромнай тэрыторыі.

Мэтай даследавання стала вызначэнне максімальна дапушчальнай вышыні перашкоды і ўзросту дрэва пры дасягненні ім вышыні паверхні абмежавання перашкоды. Для гэтага выкарыстоўваліся метады геапрасторавага мадэліравання і геаінфармацыйнага аналізу.

Апрача гэтага, былі прадстаўлены вынікі даследавання для кліматычнай зоны Беларусі, дзе разлічаны прагназуемы ўзрост драўняных парод пры дасягненні гранічна дапушчальнай вышыні.

Як адзначылі дакладчыкі, асноўнай мэтай тэхналогіі з'яўляецца кіраванне прыростам лясных насаджэнняў на аэрадроме без далейшага працаёмкага маніторынгу, забяспечваючы пры гэтым бяспеку палётаў паветраных судоў.